هه‌رچگ گه‌ردیم
هه‌ر چێ که‌فتم
هه‌ر چه پرسیم
ئوو ژنه‌فتم
نه
نه نه‌بۆ ئه‌و دی
ئه‌وه خوازم
ئه‌وه ناسم
ئاخه‌مین راو
داخه‌مین راو
که‌سه‌مین!
ئه‌وڕه‌سیمه‌و که‌فتگم شێت و شه‌که‌ت
خاس زانم
ژه نه‌فه‌س چشتێ نه‌ماگه
ژه ژیان ساتێ
ئا! ئا!
تا نه‌وێ چاره‌ی تو ره‌شتر
ئوو نه‌وێ تاڵه‌ی م شه‌ڕتر
کورپه‌گه‌م ! بایه‌د بچم
بایه‌د ئی جاره بچم
ئوو جل و به‌رگ شڕم
میرات باوانم
وه وڵاتێ تر بوه‌م
م ئه‌ڵێره
جه‌ورکیش
ده‌رده‌دار و چاوه‌نووڕ
تاکه رێوار رێگه‌ی مه‌ینه‌تم
زامدار تیر و تانه
کوورگ پاماڵمم
قه‌شمه‌ر هاماڵمم
ژێرده‌س ژێرماڵه‌م
ئا! ئا!
بایه‌د ئی جاره بچم
بایه‌د ئی جاره بچم
ئوو ده‌وار ژاریم
ده خڕی تر ئه‌ڵبده‌م
ده‌و وڵاته ک خوه‌رێ
گیان تاریکم بشوورێ
وه زڵاڵ نویر
ژه مڵاڵ پیر
ده چه‌م سویه‌ر
هه‌رچه‌ن ئێسه سه‌د خه‌ته‌ر
سه‌د کاره‌سات
ها مکوڵ
خاس زانم
چگنم یانێ مردن
یانێ ژاری
یانێ ژان
خاس زانم
ک زق زمسان
کیشێگه‌م ئه‌و دیل
په‌ڕ و باڵم سووزنێ
کیشێگه‌م ئه‌و میل
چوی له‌ش بێ تویه‌ن باپیرم
گه‌پ هووز چویچیاگ "رێزه‌وه‌ن"
ده ته‌م تاریکه‌شاو بێ چه‌م و روی
ئاخ روڵه! دی تێرم
ژه خوه‌م
داخ روڵه! دی سێرم
ژه خوه‌م
شه‌که‌تم
میه‌نگ ژه خانگ
ئاسن
ژه شار
چڕچڕ کانی چڕێ وه‌م
ئوو ده لێوێ راسه یان خاو دبینم؟
ده‌نگ قیقه‌ی خوه‌ش ئه‌تڵه‌سپووشانه
باده‌نووشان
پرچ شووڕان
جوور جاران
ئا! چمانێ بان سه‌یوان
سه‌رچاوه‌ی سه‌یر و سه‌ما
هه‌ڵهه‌ڵه‌و ده‌سچووپیه
وه‌رد وا
ئوو خش خش پرچ وه‌نگی
ئوو له‌ره‌ێ سێف
گویه‌ی بده‌ن
:سازنه شاواز لامێردان چڕێ
ئوو ژنان
هه‌ڵهه‌ڵه‌رێزان
چه‌پڵه‌رێزان
ئاگر دڵشایی ئه‌وکه‌ن
ده خۆڵ سارد و سڕ کوانگ
وه خه‌نه و که‌یف و سه‌ما
به‌ین ماین
ئوو نه‌ماین
ده‌مته‌قه‌ی تیه‌ڵ شاریاگه
باسێ ئه‌ڵاجه‌ۆ
به‌ین ماین ئوو چگن
ماینێ بێ ره‌نگ
ئوی چگنێ بێ ده‌نگ
په‌ڕه‌وازه
نه وه دڵ
وه دڵێ دڵگیر و گیرووده
مامه ناوه‌ی :
ماین
ئوو چگن
ده‌ور خوه‌م
گێژ خوه‌م
ئه‌و ده‌ور خوه‌م
ده‌ور میرکان وه‌رینان
جوور داڵ
ده‌ور سه‌رپه‌چیه‌ی قه ییمان
ڤه‌ر قه‌ڵێ مه‌شکه
کۆنه شڕ
ئا! ئا! خڕ کردمه
ئا! ئا! ژان کردمه
خیژ خوه‌م
ده‌ور خوه‌م ئه‌و ده‌ور خوه‌م
خوول خوه‌م
ئه‌ڵفڕم
نیشم
ئه‌ڵاژم
ئوو ده مه‌ستی
ده خومار گیژی و خاو و خه‌وه‌ر
سینگه‌ی سه‌یوان چڕێ وه‌م:
بایه‌د ئی جاره بچم.