ده‌ردت وه گیانم سه‌ربه‌رزی کوردان
میرات زنه‌ی، ئاورۊ ئنسان
فه‌دای ژنه‌یل سه‌ربه‌رز و راسد
شێره‌کوڕه‌یل نه‌ترس و خاسد
کورد و کوردستان نازێ وه ناود
ئازادی وڵات دۊنم له چاود
تو ره‌نگینی هه‌رچێ دیمه‌نی
هه‌ڵهه‌ڵی ئاوی له گووش کیه‌نی
له‌ێ وشکه ساڵه تو باڵا کیشای
سه‌ر نه‌چه‌مانید و باج وه دێو نیای
ئه‌ێ شار شاران، ئه‌ێ زه‌خمی له ده‌رد
سه‌ربه‌رزی ژنان، شانازی هه‌ر مه‌رد
ده‌رده‌یلم فره‌س، ده‌م بێه ژانم
کووبانی ئه‌زیز کوتێ له گیانم
چه‌وه‌یل ئه‌زیز چه‌وه‌ڕێ تنن
له باخه‌یل ت ئارزوو چنن
ده‌نگه به‌رزه‌گه‌ی، شه‌نگال له‌ت له‌ت
هه‌ڵه‌بجه وه زۊخ له ژان تو وه‌ت
ئه‌نفاڵ فه‌یلی له ریشه‌ێ تنه
ژان بیستۊن له گیان منه
زه‌خم مه‌هاباد هێمان ها شانم
مه‌ڵهه‌م هووره بخوه‌ن له گیانم
سه‌د ژان تره‌ک ئه‌ر به‌ن له ژانم
له‌نوو ئه‌ڵسم مِ تاقوه‌سانم
زه‌خمه‌گه‌ێ فه‌رهاد وه تو چاره که‌م
سه‌د له‌یل و شیرین راد ئاواره که‌م
کووبانی عه‌زیز ئازای دلاوه‌ر
تاج سه‌ربه‌رزی به‌شه‌ر بنه‌و سه‌ر
سه‌د دڵ عاشق که‌م وه قورباند
گیان کرماشان وه نه‌زر گیاند
بمارکد بوو ئێ تاج سووره
ئێ خوه‌ر نازار ئێ عشق و نووره
س: taqwesan