مه‌م له ئاڵان، زین له بووتان
هه‌ر دگیان به‌شێ له خاک کوردان
ئاڵان و بووتان دوورن له یه‌کان
وه‌ڵام زین و مه‌م کریاوینه نیشان
مه‌م مامه‌ده و زینه‌ت زین
عاشق یه‌ک بوینه، دو مه‌لێ نه‌خشین
وه خوه‌شی خوه‌شی ده‌م وه خه‌نه‌وه
هه‌ر رووژ یه‌ک دوینن وه ده‌روه‌نه‌وه
یه‌کێ شاکه یه‌کێ خان مه‌سوور
قسیه‌ی خوه‌ش نه‌یشتن وه مه‌ڵوه‌نه‌وه
باس دڵداری هه‌ر به‌رده‌وامه
تویله‌س،چویزه‌س، ئه‌و نه‌و نه‌مامه
قسیه‌یان عه‌‌تره‌و، نوقڵ و شه‌مامه
مه‌م خوازمه‌نی که‌ر له ئاڵانه‌وه
وه ته‌مای زینو له بووتانه‌وه
کاریان راس هاتوود له خه‌یاڵانه‌وه
وه‌ڵام هه‌ی وه‌ڵام
یه‌ی فه‌نێڵ فیڵباز وه ناو "به‌کر مه‌رگه‌وه‌ر"
فتن درووزن، شووڤار هه‌ف سه‌ر
بویه‌سه راوێژکه‌ر هووز شاپه‌روه‌ر
توای هشک بکه‌ی کانی عاشقان
مه‌‌غاران بێ به‌ش له دیدار یاران
ها فرسه‌ت لیان، له خاوی دڵیان
گاهس بکپنێ قاسپه‌ی که‌وکیان
کارێ کاری بوو گزیر ناکه‌س
زندان کرده به‌ش مه‌م چاره ره‌ش
مه‌م مێوان سیاچال
زین په‌شیو و به‌د حاڵ
سه‌ختی فره‌ی کیشاس، ناخوه‌ش ئه‌حواڵه
خودا بڕمنێ هه‌رچی سیاچاڵه
ده‌نگی ها گووشی هه‌رچی سیاماڵه
مه‌م گیان ئه‌سپارد له به‌ندیخانه
بایه‌قۆش قووڵان له ده‌ر ده‌رانه
خه‌وه‌ر گه‌ییه له‌یلای زه‌مانه
ئه‌ویش له شوون مه‌م بویه‌سه دیوانه
له خه‌م وخۆسه، ده‌رد و په‌ژاره
له مه‌رگ دڵدار که‌پوو ئاواره
شیرن زه‌مان هه‌ڵوژنێ نه‌مان
ماڵئاوایی که‌ی له خاک کوردان
چه‌ورێ یاره ئی ده‌ف له‌و جهان
سڵاو له "خانی" شاعر زانا
"مه‌م و زین "وه ی ره نگینیه دانا