خوه‌ى، كارتۆنه‌گه‌ى خسه بان زه‌وى و ئڵاژیا.
كه‌وشه‌گانى نیا ئه‌و ژیر سه‌رى پڵاسه‌گه‌ى كیشا مل له‌شیا، ده‌سه‌یلى كرجه‌و كرد و نا وه ناو گه‌ڵى.
خیاوان بى ده‌نگ بوى، هویر و فكرى تا ئه‌و دویره‌یله برد، كرمیته‌یل هویرى دانك دانك ئه‌ڵچه‌كان.
له پشت ترویسكه‌ى شۆه‌له‌یلى نیمه‌گیان، بزه‌خه‌نه‌یل دونیا ڕوومه‌ته‌یل دونیا، ڕوومه‌ته‌یل لێڵ و بزه‌خه‌نه‌یل پڕ ڕه‌نگ، هه‌وا سه‌ردوى و ده‌سه‌یلى سه‌ردتر، كرجه‌و بوى، بایه‌د زویتر خه‌ویه‌و بوه‌یدن.
ڕپه‌ى پایلى هات و ... چى، پیا وه‌ل خوه‌یا فكره‌و كرد ك خاسه كه‌سى له حاڵ دڵ خه‌وه‌ر نه‌یرید، خه‌نگى تیه‌ڵ ڕچگیا وه بان لیوه‌یلیه‌و.
ئه‌گه‌ر كه‌سى بڕه‌سیده‌و ك ئه‌ویش دڵى دیرید فره گه‌ن بوود، گاهاسه سه‌ر بنه‌نه سه‌رى.
پیا هیمان غروور داشت و عشقیش داشت، مه‌یشوقه‌یش داشت، فاتمه، دویه‌تى كه له‌و ڕووژه‌یلى دویره ئرا پیاگه خه‌نسیا، هویر وه ڕووژى كرد ك له فاتمه خوداحافزى كردوید ئرا هاتن وه شار.
وه‌توید: - تیه‌مه‌و و سویر كه‌یمن، فاتى، وه ده‌س پڕ تیه‌مه‌و...فاتمه له نوو هه‌م خه‌نس.
هاته شار، سى مانگ كارگه‌رى كرد، ئراى خه‌وه‌ر هاوردن ك فاتمه خوازمه‌نى كه‌ر فره دیرید، خوازمه‌نى كه‌ر شارى، خوازمه‌نى كه‌ر پویلدار، عه‌كس فاتمه هاته ناو زه‌ینى، فاتمه دى نیه‌خه‌نس.
قاقه‌زى له ڕوى دیوار دى و ته‌سمیم خوه‌ى گرت، چیه بیمارستان، یه‌ى گورچى دا و پویله‌گه‌ى گرت، فرووشانى یه‌ى گورچى چویناى فرووشانى یه‌ى ده‌نك سیف مینس.
حساو كرد، پویله‌گه‌ى خراو نه‌وى، ئرا یه‌ى سویر و شام یه‌ى شه‌و و ده‌س كردن وه یه‌ى كسپ و كار.
په‌یخام دا وه فاتمه بویشن دیرى تیه‌یده‌و.
ملوانك به‌ده‌ڵیگیش سه‌ن، ئاخر پویلى نیه‌ڕه‌سى ئه‌سڵه‌گه‌ى بسینیدن.
پویله‌گانى نا وه ناو پریزگه‌گه‌ى، شه‌و تا شوه‌كى خه‌ویه‌و نه‌ورد.
شوه‌كى له‌ناو ئۆتۆبووس بوى، كوره جوانه‌یگ له لا ده‌سى نیشتوید.
داداش سیكار دیرى؟
سیكارى نه‌وى، كوڕه جوانه پخ وه پخ چى.
له ناوه‌ین ڕیه‌گه خه‌ویه‌وبرد. خه‌و دى ك فاتمه خه‌نید، خوه‌ییش خه‌نید، له ناو یه‌ى ماڵى یه‌ى وتاقه‌و گه‌رم، چه‌و هێز دا ، كه‌سى له لاى نه‌وى، پریزگ پویلیشى نه‌وى، سه‌رى گیژ بوى و وه‌رى چه‌وى سیه‌وه‌و بوى، هه‌ڵساو پا : پویله‌یلم، پویله‌یلم.
ده‌نگ بى نزى دڵسووزى هات.
- بیچاره،
- پویله‌گه‌د چه‌نى بوى؟
- هویرد ها له كوو؟
له ئۆتۆبووسه‌گه داوه‌زى، ئه‌سرى نیات، ئه‌نوو پساى خنكانه‌ى، له لاده‌س جاده نیشت، له قوڕن دڵ هاوار كرد، شوونى به‌قیه‌یل بان مازكى له ژان سزیا.
له نوو هاته‌و ئرا شار، یه‌ى هه‌فته له‌ى كه‌لانته‌رى وه‌و كه‌لانته‌رى، له‌ى پاسگا وه‌و پاسگا بیهووده و بى سه‌ره‌نجام هات و چى، پشتى شكیا، دڵى بڕیا ، وه خوه‌ى وه‌ت خوه‌زه و دڵیش فرووشى بویا.
...
- هه‌ڵس برا، هه‌ڵس ئیره جیى خه‌فتن نیه ...
چه‌وه‌یلى واز كرد، ڕووژا هاتوید، له‌شى چوى چوو وشك بوید، خوه‌ى كڕان وه‌ره‌و كماره‌ى پله‌گان و كارتۆنه‌گه‌ى ئه‌ڵته‌كان و جه‌مه‌و كرد.
ده‌ر بانك واز بوى، ئاز هه‌ڵسان نه‌یاشت، ئایه‌مه‌یل هاتیان و چیان.
-داداش ئاگر دیرى؟
ده‌نگ ئاشنا بوى، هه‌ڵه‌وگه‌ردیا، خوه‌ى بوى، كوڕه جوانه‌ى ناو ئۆتۆبووسه‌گه له ناوه‌ڕاسى پیاده‌ڕه‌و وساوید، چه‌وه‌یلیان گیریا له یه‌ك، ده‌رفه‌ت فكركردن نه‌یاشت، وه ته‌مامى زوور و توانایه‌و هڵامات دزه‌گه برد.
هه‌ى دز هه‌ى دز هــــــــــــــه‌ى دز ، پویله‌گانم به‌ره‌و، ناپیاى خودا نه‌ناس... ئاى مه‌ردم...، جوان ناسیه‌ى.
- وه‌ردم ده ناپیاى گیا، كام پویل؟ وڵم كه گه‌ن و گوتاڵ...
كه‌له‌كه‌ى چه‌پى داخه‌و بوى، سزیا، شوون به‌قیه‌گان، له نوو هه‌م سزیا، و له نوو ... كه‌فته زه‌وى.
جوان دز هه‌یواى.
- ئــــــــاییییییى یى یییییییى.
مه‌ردم تازه كوو بوین ئرا تماشا، ده‌سى دڕ كرد وه‌ره‌و لاى جوان ك دویر و دویرتره‌و بویاد.
- بگرنه‌ى .. پوى . له .. گانم.
ده‌نگى كه‌م ئاز بوى.
ده‌نگ بى نز دڵسووزى هاتیا.
چه‌قوو دریاس له‌لى ...
بیه‌نه‌و لا .. ده‌س له‌لى مه‌یه‌ن ...
- گداس؟
-چ خوینى له‌لى چوود...
ده‌سى نا له شوون چووڵى گورچیى، ده‌سى داخ بوى، چه‌قووى خوینى كه‌فتویده بان زه‌وى، وه‌ر چه‌وى سیه‌وه‌و بوى، چه‌وه‌یلى به‌سا و ... به‌سا.
نه عه‌كس فاتمه دى، نه ده‌نگ ئایه‌مه‌گان ئه‌ژنه‌فت، گیشت لایگ تیه‌ریك بوى ... تیه‌ریك.
........
ته‌مامى زنده‌گیى بوى وه یه‌ى خه‌وه‌ر له ناو ڕووژنامه:
یه‌ى كارتۆنخه‌ف له ئه‌سه‌رى چه‌ن جار چه‌قوو خواردن مرد، هه یه ....
هویچ بنیایه‌مى له حاڵ و ڕووزگار ئایه‌مى تر خه‌وه‌ر نه‌یرى، نه كه‌سى ئه‌وڕه‌سى ك پیاگه كى بوى، نه كه‌سى ئه‌وڕه‌سى فاتمه چه وه پى هات.
زنده‌گى چویناى خه‌ت خه‌تى كردن له بان قاقه‌ز سیه‌ى مینى.
بانتر له سیه‌ى ك ڕه‌نگى نیه.
چمان ته‌قدیرى هه یه بوى ك باید و گورچیى بفرووشید وه یه‌ى ئایه‌مى تر، شایه‌د فاتمه‌یش مردیه، شایه‌د له‌و دنیا ماڵى یه‌ى وتاقه‌ى گه‌رمى گیریان باید و چویناى ئایه‌م زندگى بكه‌ن، كه‌سى چوه زانى؟
كه‌سى چ ره‌غبه‌تى دیرى ك بزانى؟
ژیان وه نه‌زانسنه‌یله‌و شرین تره‌و بوود.
مه‌ته‌ل ئایه‌مه‌یل، جوور لاوه لاوه نیه.
مه‌ته‌لى ئایه‌مه‌یل، قه‌سیده‌ى خوسه‌یله.
ت/ محه‌مه‌د حه‌سه‌نى نیا