سه‌د گله تر ئاسمان بوودن وه بانی په‌ر نیه‌م
بان سیم به‌رق خیاوانه‌یل تو خوو گردمه
گشتی دیرن وه‌یره چن، هه‌ر من وه ئی سه‌رما مه‌نم
من وه وه‌فر سه‌رد زمسانه‌يل تو خوو گردمه
چوی بچم وه‌ختی دڵم گیره وه لای چه‌وه‌یلده‌و
چوی بچم وه‌ختی وه سه‌ر دانه‌یل تو خوو گردمه
سه‌د گله خه‌رمان ئه‌گه‌ر بوودن و یه‌ی هه‌مکه گه‌نم
من فه‌قه‌ت وه‌و یه‌ی که‌مه دانه‌يل تو خوو گردمه
من ده‌سی بیمه وه لاێ خنجگه‌ی چه‌وه‌یلده‌و
من وه هويرده نان گیفانه‌یل تو خوو گردمه
سه‌د گله تر تیرکه‌مان بوودن وه ماڵد ده‌ر نیه‌چم
من وه ئه‌و ژان خوه‌ش سانه‌یل تو خوو گردمه
ناو هه‌ر خاکی بنه‌یده‌م ئاومیش به‌ی به‌ر نیه‌م
چوين وه ماڵ تنگ گۆڵدانه‌یل تو خوو گردمه
خوه‌شترین کارم یه‌سه خیس بووم له پشت ده‌روه‌چد
من وه قه‌تره قه‌تره وارانه‌یل تو خوو گردمه
بیل که‌می گیره بکه‌م هه‌ر جوور جارانه‌یل دوير
من وه تو، کنار تو، شانه‌یل تو خوو گردمه