ماچێ له مل حه‌وا
ماچێ ئڕای م شه‌فا
ماچێ هه‌م ده‌رد و هه‌م ده‌رمان
ماچێ ته‌زده‌رکه‌ر گیان
ته‌زساڵه‌یل پڕ له ژان
ساڕێژکه‌رخه‌م نان
ماچێ، هویرێ کویه‌نه بوی
وه‌ڵام تامی تازه بوی
تازه‌و رازاوه بوی
که‌م بوی،
وه‌ڵام پڕ په‌یمانه بوی!
ئافشاری بوی ماچ ئه‌و
ڕشیا له‌ش زار شه‌و
شه‌و بویه ڕووژ که‌و
گووڕیاد هه‌وا و که‌ش من
خوه‌شی کریاده به‌ش من
تامازروویی و تینیه‌تی
باوش سه‌ردی و مه‌ینه‌تی
ده‌روه‌ده‌ری و شه‌که‌تی
بار کردیه له وڵاتم
هنای ماچ بویه خڵاتم
له خوه‌شیا هه‌ڵاتم
هاته دی ئاواتم
دی چه بویشم ماڵه‌گه‌م
له ماچ لیو ئاڵه‌گه‌م
له هساره‌ی تاله‌گه‌م
تاله‌ی تازه وازه‌گه‌م
خودا چه‌نێ خوه‌شمه
ماچ له‌یلم به‌شمه
له‌یلم له باوه‌شمه!