له‌ ئه‌و شه‌وه‌یل دۊره‌ چشتێ ئەڕام نه‌مه‌نیه‌

   له‌ قسیه‌گان ئه‌وسا مشتێ ئەڕام نه‌مه‌نیه‌

   ھه‌ر شه‌و له‌ ئی ده‌واره‌ سنگ ده‌م له‌ناو چه‌وه‌یلم

   له‌ ژێر بار خوه‌زیه‌و پشتێ ئەڕام نه‌مه‌نێه‌

   ده‌خیل سه‌ر ده‌واگه‌ی ژێر ده‌وارم ئمشه‌و

   تووام چۊ ئه‌ور ته‌نیا لێره‌ بووارم ئمشه‌و

   له‌ی پشت چیخه‌ ھه‌ر شه‌و نووڕم وه‌ئه‌و چراخه‌

   کووانێ خه‌یاڵم ئمشه‌و ورسی نان داخه‌

   ئه‌و ھاوکوڕه‌یله‌ مردن، کایه‌ بکه‌یمن ئمشه‌و

   وه‌خت خوه‌ش دزین سێفه‌یل کاڵ باخه‌

   م بایه‌ قوش کوور ھووز شه‌وارم ئمشه‌و

   له‌ بان زین شکیاێ که‌ێه‌ر سه‌ووارم ئمشه‌و

   که‌پووکه‌پوو ئەڕاێ چووه‌ لێره‌ که‌پوو که‌پوو که‌ێ؟

   دی که‌ێ مناڵ تێژێ ڕیخێ له‌ تیرکه‌وان نه‌ی

   که‌پوو قسیه‌ی که‌سێ بۊ ناوێ له‌ ئاسیاو مه‌ن

   که‌س گووش وه‌ پێ نیه‌یدن، بێخود شه‌که‌ت خوه‌ێ که‌ێ

   گووش وڵات زڕانه‌و قیژه‌ی ھه‌وارم ئمشه‌و 

   م له‌ی وڵات چووڵه‌ مینگه‌ نووارم ئمشه‌و

   ناوک من و ت ئه‌رجن، لێره‌ وه‌ ده‌م بڕینه‌!

   ئه‌سر چه‌وه‌یل ئیمه‌ وه‌ ڕیخ چه‌م سڕینه‌

   سجیلْ به‌خت ئیمه‌ لەو بان ئاوه‌ نۊسان

   ناوه‌یلمان له‌ گووش ساڵه‌یل ته‌م  چڕینه‌ 

   چۊ که‌و لانه‌ورێزێ له‌ ژێر سانم ئمشه‌و

   له‌ ئه‌و شه‌وه‌یل سه‌رده‌ دی ھۊچ نیه‌زانم ئمشه‌و

   ئه‌وسا وڵات ئیمه‌ مانگه‌شه‌وه‌یل نۊر بۊ

    ورد زووان ئیمه‌ قسیه‌یل خانمه‌سۊڕ بۊ

   تا چه‌و دۊنێ که‌لاوه‌ سه‌ف دایه‌ له‌ی وڵاته‌

   ئه‌وسا له‌ جی پاوەموور، چووپی کیشان سۊڕ بۊ

   ده‌خیل سه‌رده‌واگەی ژێر دەوارم ئمشه‌و

   تووام چۊ ئه‌ور ته‌نیا له‌یره‌ بووارم ئمشه‌و

 عه‌لی ئوڵفەتی