هه‌رساڵ به‌رزتر بوو به‌ختت له باڵاێ بیستوین
بێباك له سیاتى ده‌س، تووفان و ته‌شه‌ر، كرماشان
سه‌وزە سه‌رشانه‌یلت له فه‌سڵ سه‌خت خه‌زان
نه‌رگس وەهاری دەیته مزگانى به‌شه‌ر، كرماشان
چله‌ێ زمسانه، شه‌لاق كڕیوەس، تانه‌ێ تووفانه
گڕەێ ئاگرگات دێرێ، نیشانه له خوەر، كرماشان
له گه‌رده‌نه‌ێ خه‌ته‌رەیل ناكاو ئى چه‌رخ گردوونه
سه‌رت ههر به‌رز مه‌ێدانه و سینه‌ت سپه‌ڕ، كرماشان
گیرووده‌ێ دەس بێگانه بیته و زەخم زەمانه دیته
زامه‌كانت كه‌یمه تاجه‌‌گوڵ ونه‌یمه‌‌ێ سه‌‌ر، كرماشان
وه ئه‌سرین دیده‌مان، وه‌ل ئاو سه‌یمه‌‌ره و سیروان
خاس شووریم باڵات، له‌ى خویناو جگه‌ر، كرماشان
تو ئه‌ى سفره سه‌‌ره ڕێ ڕێویاران هند و چین
یادگاره قه‌‌یمه‌كه‌ێ كاكه هوخشته‌ر، كرماشان
ڕه‌مز ڕزگارى كوردانى، خاک خێڵ خوەر نیشان
داخم چوى كه‌س له هاڵت ناپرسێ خه‌‌وه‌ر، كرماشان
دڵگیر نه‌ویت له گه‌نى داب گه‌ردوون، مهرەبان شار
چوین باخیچ بێ به‌شه دایم له ساێه و سه‌مه‌ر، كرماشان
نه گوڵ بگر نه مه‌‌داڵ، له ده‌س بێگانه‌یل ته‌مه‌دار
یانه بوو گوڵ كه‌نه ژار، مه‌داڵیچ وه نه‌شته‌ر، كرماشان
دهفتهر یاده‌‌كانت بێستوینه، ده‌‌فته‌‌ردار تو شاهان
سه‌‌بته ئه‌‌سرار سه‌‌نگینت، له سه‌د دهفتهر، كرماشان
مه‌وزه‌ێ كوردانه، قوێه‌‌ێ ئاشقانه، ئه‌و تاقوه‌سانه
ئه‌شق شیرین و ڕه‌نج فه‌‌رهادت ناچووته هه‌ده‌ر، كرماشان
میلكان كورد دویره، كاروان شه‌‌كه‌‌ته و ده‌لیل نابه‌‌ڵه‌ێ
هه‌ڵسه واده‌ێ سه‌رسواریته، سه‌فه‌ر بێ خه‌ته‌ر، كرماشان
سه‌‌رزه‌وى كتاوه كوچكینه‌كان، دى خوه‌ت وه كه‌م مه‌زان
دڵ خاكت پڕ له نه‌خش و نگاره و ئه‌‌سه‌‌ر، كرماشان
ههر له به‌رزیه‌كه‌ێ په‌ڕاو، تا دڵ پڕ داخ زەهاو
هووره، هویلانه و هه‌ڵپه‌ڕكه‌س، چووپیت بێ چه‌مه‌‌ر كرماشان
چه‌و ته‌مه بڕینه‌سه باڵاێ بێ نازت، ڕه‌قیبان ئیسه
كوور كه‌یم ئه‌ر چه‌و ناپاكێ وه تو داشت نه‌زه‌ر، كرماشان
ههر شوونت شاهد شانامه‌ێكه و ههر فه‌‌ردت، فرده‌وسێك
ئاڵات خوه‌رنیشانه و خاكت پڕ له سیم و زەڕ، كرماشان
ئه‌ر بڕینه‌س شه‌وپه‌ره‌ستان، گڕەێ ئاگر له ئاگردان
په‌‌نانى پڕه كویره دڵ یاران له شوڵه و شه‌ره‌ر، كرماشان
دى وه‌خته باخ ته‌جربه و پندار نیكت، بكه‌یمه كردار
خاون ئى خاكه خوه‌ى، بچنێت له‌ى باخه به‌ر، كرماشان