یه سێیم جاره بووگه وه‌ى و شین
ده‌ن له سه‌دریه ناوچه‌ى كوردنشین
ئه‌و ده‌سه بشكى ئه‌ى ده‌سه وه‌شان
كوت كوت دارزیه‌ى وه ده‌رد سه‌ره‌تان
ئه‌و ده‌سه شه‌ل بوو بى گوناكوشى
خودا له‌گشت شوون بووڕیگن به‌شى
زووڵه و نادرس بى دین و ئیمان
قه‌یزه‌و ناپه‌سه‌ن له‌وه‌رچه‌و جه‌هان
هه‌رچه‌نده بكه‌ن هویچ پیان نیه‌كرى
كارگه‌ن نیه‌تویه‌نى ڕێ عه‌دڵ بگرى
یانه هووكاره‌ن وه‌ى كار و باره
ناو دڵیان پڕى له زه‌هر ماره
هه‌ر كه‌س ئیمام و جامیه وماڵ رمان
دویره له‌خودا له دین و قورئان
سه‌رئایه‌م بڕین له‌لاى ئاسانه
علم و كرده‌وه‌ى ده‌رس شه‌یتانه
یانه دین نه‌یرن خودایش نیه‌ناسن
یانه بیمارن یانه وه‌سواسن
یانه بوو بویشن عیراق گریمن
ئه‌و جووره توایم بڕیم و كوشیمن
هه‌ركه‌س قه‌تڵ بى گونا كه‌یگه‌ن
دونیا وه‌خوشى ئه‌وه‌سه‌ر نیه‌وه‌یگه‌ن
عیراق گرانه عیراق سه‌ر به‌رزه
دڵ خه‌تاكاره‌یل ناگه‌سه له‌رزه
كورد وعه‌ره‌بى ئاشوورى و كلدان
ئه‌و دویاى ملله‌ته‌یل سوبى وتوركمان
سنى وشیعه ومه‌ردم گشت به‌شى
پشت یه‌ك گرن له ته‌نگى وخوه‌شى
جه‌وه‌ڵ عیراق وشار و زه‌وى و ئاوى
دوژمن ئه‌وه‌ن گه‌ن كه‌ى له‌ناوى
هه‌ركه‌س وه غه‌در ئایم بكوشى
ئه‌وه بى ناموسى ها خوین و له‌شى
وه شوون ئاواى ئه‌نفاله‌یل قه‌سه‌م
وه شوون و زام كیمیاى تووژ به‌سه‌م
قه‌سه‌م وه‌حه‌ڵه‌بجه و قه‌سه‌م وه بارزان
وه‌و هه‌شت هه‌زاره بى سه‌ر وه‌شوون مان
قه‌سه‌م وه‌یانه‌و وه‌گووڕ شه‌هیدان
وه‌و په‌نج هه‌زاره له‌فه‌یلیه‌یل نه‌مان
داخ سه‌دریه یه‌ك جار گرانه
كاره‌ساته‌گه‌ى فه‌ره وه ژانه
وه‌گووڕسان جه‌ماوه‌رى قه‌سه‌م
گووشه‌ى دڵه‌گه‌م ئه‌رایان ها له‌خه‌م
وه ئاه و ناڵه‌ى زامداره‌یل قه‌سه‌م
ئاگر سه‌دریه ها دڵ و جه‌سه‌م
كام دین قه‌بوول كه‌ى كام دین یه ئویشى
خوه‌ى ته‌قنیگه‌و بى گونا كوشى
چه‌نى یه‌تیم كه‌ى مینن سه‌رگه‌ردان
له‌وه‌رده‌م خودا چه‌ویشن وه‌خوه‌یان
هه‌زاران پیر و هه‌زاران بیوه
هه‌زاران مناڵ گشت بار وه لیوه
چه‌نى له‌ماڵه‌یل بى گونا ڕمیه‌ن
چه‌ن خیزان بى گونا شیه‌ر وه‌ده‌ر كریه‌ن
ئاه دویدمان یانه هه له بن
پیر و یه‌تیمه‌یل مناڵ بیوه‌ژن
ڕه‌سیگن وه‌لاى هه‌فتمین ئاسمان
وه ئه‌سر چه‌وه‌و وه ناڵه‌و گریان
ئویشن قه‌بوول كه‌ید خودایا وه‌ى كاره
یه‌وه ئیمه كه‌ن ئه‌یه چه‌ن جاره
خودا ره‌حمه‌ت شه‌هیده‌یل بكه‌ى
سه‌بوورى وه دڵ ماڵه‌یلیان به‌ى
خودا شفا به‌ى وه‌گشت زامداره‌یل
وه‌گشت دڵڕیشه‌یل وه گشت بیماره‌یل
خودا سه‌بوورى وه‌یه‌تیمه‌یل به‌ى
ڕیشگ گه‌نه‌كار له‌بنا ده‌ركه‌ى