شعر - نصراللە آذرپیرا
خوازم ئەژ ئی شەهر ِ خینینە بجم
ئەژ دەس ِ ئی خەڵک ِ بێ‌دینە بچم
خوازم ئەژ ئی شەهرە تا توونم بوام
زیتر ئەژ ئی دووزەخ ِ داخە دەرام
داخم ئەژ ئی مەردمە، داخ ِ دڵە
جا خاوم تەژگاو رەفێقم ئزگڵە
ئەژ خەم و دەرد تووقیایە ماڵ ِ مِ
درک و ژۆنم رووژەل ِ هەر ساڵ ِ م ِ
دەێ ڤڵاتە ئەژ کەسێ خەێرێ نەدیم
گەرد ِ ئی خەڵکە گڕێ دڵخوەش نەویم
دەێرە فەرهادیش ک ِ کەش‌پەهلی کەرێ
گەرد ِ شیرینیش دەم‌تەهڵی کەرێ
ئی ڤڵاتە جاکەێ ژینم دەێ نییە
خەێر ئەژەێ پڕ گرتێیە نیرێ چییە
لێوخەنەێ کردم دنوونم ئشکەنن
عاشقی کردم سخۆنم ئشکەنن
خوازم ئەژ ئی شەهر ِ خینینە بچم
ئەژ دەس ِ ئی خەڵک ِ بێ‌دینە بچم
٭
شعری زیبا بە گویش کوردی پهلەیی
ایل کورد جنوب استان ایلام