فه‌رمايش كردگه (وما خلقت الجن والأنس الا ليعبدون) ، يه‌يش مه‌عناگه‌ی پاك وئاشكراس ، دويای ئه‌وه‌يش بی ده‌سڵاتترين كه‌سيگ ئه‌و كه‌سه‌سه ك كفر خودا له‌لای جوير قسه‌يگ ئاساييه ، ئی ديارده‌ی ناپه‌سه‌ن و ناشرينه وه‌داخه‌وه له‌ناو شعر به‌عزيگ له‌شاعره‌يل كويه‌ن و تازه ره‌نگه‌و داگه‌و هس وه كاريگه‌ری ناپه‌سه‌نی نه‌كرياس له‌هويروباوه‌ڕ خود ئه‌و شاعره‌يله‌وه ك تواسنه وه‌ی جووره كفره‌يل نابوودو نادروسه له‌كه‌دار خوه‌يان وشعرله‌يليان وه‌پی بكه‌ن ، ئمجا وه‌ختيگ شعر به‌عزه شاعريگ خوه‌نيمنه‌وه ئستغفروڵڵای فره‌يگ كه‌يم و كه‌ليمه‌يليگ شه‌يتانيانه كه‌فيگه وه‌رچه‌ومان ك له‌لای خاوه‌نه‌گه‌ی وه‌كاری هاوردگه ئه‌را جوانه‌وكردن شعر و ره‌واجكردنی ، وه‌لی وه‌چه‌واشه‌وه دياره له نه‌فامی و نزمی راده‌ی رووشنهويريه‌وه له خه‌ت قرمز لادانه‌و چينه‌سه چوارچيوه‌ی وشه‌يل حه‌رام و ناجايسه‌وه .
ئيمه له‌يرا ره‌خنه‌ی ئه‌وه گريم له‌و شاعره‌يله ك ئايا له‌وه‌ر تاريفكردن جوانی ئافره‌تيگ ك خودا خوه‌ی قه‌ڵه‌می كيشاگه‌و جوانی وه‌پی داگه بووگ كفر جووراو جوور بكه‌يد و له‌نه‌خش خودايی دويريه‌و بخه‌يد ؟ ئايا بووگ كه‌سيگ ك خوه‌ی دروسكه‌ر زه‌وی و ئاسمان بووگ چه‌و‌ی گشت ئه‌و خاكه نه‌وينيگ و له‌هه‌مان وه‌خت وه‌نابينا تاريف بكريه‌يگ ؟ ئايا له‌خودا زياتر (سوجده) ئه‌را كه‌سيگ تر بريه‌يگ ؟ گشت ئه‌يانه‌و زياتريش له‌ی جووره كفره‌يله وه‌شعره‌وه ك وه‌داخه‌وه كه‌فيگه وه‌رچه‌ومان له‌ناو ديوان و كتاو شاعره‌يل و بيجگه ئه‌وه‌يش فره‌يگ له‌و شعره‌يل ناجوور و ناپه‌سه‌نه له‌ڕوی دين و شه‌رعه‌وه ته‌ماشا كه‌يد كريانه‌سه گوورانی له‌لايه‌ن گوورانيچڕه‌يله‌وه .
ئمڕوو ئيمه دوينيم ره‌خنه‌و ره‌خنه‌كاری فره‌ی فراوانيگ هه‌س له‌مه‌يدانه‌يل جووراو جووره‌وه ، وه‌لی ته‌نيا مه‌يدانيگ ك وه‌داخه‌وه فه‌رامووش كرياس ، ئه‌ويش مه‌يدان ره‌خنه‌گرتنه له شعر ، ك هه‌وڵ راسه‌قينه‌يگ نه‌درياس ئه‌ڕا ئه‌وه‌ك مه‌يدان ئه‌ده‌ب و رووشنهويری و هونه‌ر وه‌بيگه‌ردی بمينيگه‌وه‌و كلتوور ره‌سه‌ن كورديمان له‌كه‌دار نه‌وگ . ئيمه له‌ناو شعر كوردی شعره‌يل نه‌سه‌ق و كۆميدی فره‌يگ ديريم ك تاراده‌يگ كاريگه‌ری خراويگ نه‌كردنه‌سه بان شعوور ئنسانيه‌ت و نه‌ته‌وه‌يل فره‌يگيش له‌ی جووره شعره‌يل نه‌سه‌قه ديرن ، ئه‌را نموونه جوير شعره‌يل (شێخ ره‌زای تاڵه‌بانی) و چه‌ن شاعريگ تر ، وه‌لی شعر كفركردن خه‌تای گه‌ورايگه‌و بيجگه ئه‌وه‌ك خاوه‌ن شعره‌گه كه‌فيگه ناو زه‌ره‌د ئاخرته‌وه ، هه‌مان وه‌خت گووش كوومه‌ڵگايش وه‌پی پڕ بووگ و شايه‌ت شاعره‌يل تريش چه‌و له‌لی بوڕن و هه‌مان شيوه له‌شعره‌يليان بارنه كار . ئمجا له‌ی باوه‌ته‌وه خاستر ئه‌وه‌سه هويرده‌كارييگ له‌لايه‌ن ده‌زگايه‌يل په‌يوه‌نديداره‌وه بكريه‌يگ و بگه‌ردنه ناو ديوان شاعره‌يل و گشت ئه‌و شعره‌يل كفركردنه ده‌سنيشان بكه‌ن و له‌ڕی ميديايه‌يله‌وه به‌رنامه‌ی تايبه‌تيگ دابنريه‌يگ ئه‌را ره‌خنه‌و ره‌خنه‌كاری له‌شعر (وه‌تايبه‌ت شعر كفركردن) ك بايه‌سه مه‌رزيگ ئه‌را ئی ديارده‌ی ناشرينه دابنريه‌يگ و كوومه‌ڵگا له‌لی ئاگاداره‌و بكريه‌يگ تا هويچ شاعريگ نزيكه‌و نه‌وگ له‌ی ديارده‌و هه‌مان وه‌خت كه‌ناڵه‌يل ته‌له‌فزيۆن و راديۆيش ئاگادار بوون له په‌خشكرن ئه‌و گوورانيه‌يله ك شعره‌يليان كفر له‌تی كريه‌يگه دی ، چوينكه ئيمه به‌نه‌ی خودايم و هه‌ر بايه‌سه ره‌زامه‌نی خودا وه‌ده‌س باريم و نزيك كفره‌و نه‌ويم .