كوڕ ڕه‌زا)ى بانیارانى هاته‌سه دونیا ، ته‌یموور خوه‌ندن سه‌ره‌تایى له‌بانیاران شوون له‌دایگبوینى ته‌واو كردگه‌و دویاخر چیه‌سه ئاوایى (تووت شامى)، له‌شوون ئه‌وه‌یش چیه‌سه شار (كرند)و له‌ورا له‌نزیكه‌وه ئاشنایه‌تى وه‌ل یارسانه‌یل ئه‌هل هه‌قا په‌یا كردگه‌و كتاو (سه‌ره‌نجام)و بیجگه ئه‌وه‌یش به‌لاغه‌ته‌یل تر دینى خوه‌ندگه.
ته‌یموور له‌عومر 21 ساڵى له‌ناو له‌شكر (مه‌لك نیازخان گۆران) بویه‌سه سه‌رباز. ئمجا له‌ساڵ 1852 له‌وه‌ختى توركمانه‌یل په‌لامار شار ته‌هران دان و تاڵانى كردن، ته‌یموور وه‌خوه‌ى و له‌شكریه‌وه توركمانه‌یل ته‌فروتوینه كردو شار ته‌هران قورتار كرد. هه‌ر یه‌یش بویه هووكار ئه‌وه‌ك ئه‌و له‌شكره له‌لایه‌ن (ناسره‌دین شاى قاجار)ه‌وه پاداش بكریه‌ى. دى وه‌و جووره له‌شكره‌گه له‌بان داواكارى شا له‌ته‌هران مه‌نده‌وه‌و دى (ته‌یموور)یش خه‌ریك رابه‌رایه‌تى خه‌ڵك هه‌ق یارسان بوى و ئه‌را ئه‌و مه‌به‌سیشه جموجویل فره‌یگ نیشاندا.
دویاخر نه‌یاره‌یل ته‌یموور كه‌فتنه دژایه‌تى و كیشمه‌كیش وه‌لیاو له‌شوون بوختان فره‌یگ، له‌لایه‌ن ناسره‌دین شاى قاجاره‌وه گیریاو خریا ناو زندان، ته‌یموور ئه‌را ماوه‌یگ له‌زندان مه‌نده‌وه‌و دویاخریش جیواز كریا ئه‌را شار كرماشان و شه‌ش مانگیش له‌ورا له‌زندان مه‌ند، ئمجا دویاخر وه فه‌رمان شا وه‌تاوان زندیقى و ده‌رچگن له‌دین ئسلام له‌ساڵ 1856 دریا له‌سێداره. بیگومان یه‌یش كاریگه‌رى فره گه‌ورایگ كرده بان په‌یڕه‌وكاره‌یل و یاره‌یل یارسان و هه‌ر جووریگ بوى ته‌رمه‌گه‌ى وه‌رگرتن و له‌كرماشان وه‌خاك سپاردنه‌ى ك وه‌شه‌هیدیگ تر هویر و ڕاى ئازاد له‌لایه‌ن مه‌ردمه‌وه دریا قه‌ڵه‌م.
ته‌یموور له‌ڕیكخریاگ یارسانه‌یل و مه‌ڵوه‌ن دینى یارسان وه( شا ته‌یموور بانیاران)ى ناسریا. دیوانه شعریه‌گه‌ى ته‌یموور نزیكه‌ى هه‌زار خه‌تیگ بووگ و ناسریاگه وه(ده‌فته‌رى ته‌یموورى)و یه‌كیگه له نامه‌یل پیرووز یارسان.
شعر ته‌یموور ره‌نگدانه‌وه‌ى دینه‌گه‌یه‌و له‌چوارچیوه‌ى سۆفێزم خوه‌ى نیشانده‌یگ و خه‌ریك نه‌زه‌ریه‌یل (دونا دون)ه‌و شیوه‌ى كردگار له‌گشت چشتیگى دوینید. ئمجا ته‌یموور و یاره‌یلى هه‌میشه له‌شوون (حه‌قیقه‌ت) گه‌ردینه‌و له‌وه‌ر خاتر ئه‌و هه‌قیقه‌تیشه ویڵ و سه‌رگه‌ردان بوینه، وه‌ل ئه‌وه‌یشا شاعر وه‌ناو خوه‌یه‌وه قسه ئه‌كاو ئویشیگ:
من وه‌ى ده‌رده‌وه، من وه‌ى ده‌رده‌وه
تاكه‌ى بناڵم من وه‌ى ده‌رده‌وه
وه‌ى ده‌رد خواخه‌ى ساحێب شه‌رده‌وه
راى قه‌رار نوخت كه‌س نه‌كه‌رده‌وه
زوان وه‌لاڵه و چه‌م وه‌هه‌رده‌وه
دڵ وه زوخاوان داخ و ده‌رده‌وه
تاكه‌ى بگێڵم وه‌سه‌ر هه‌رده‌وه
وه‌ى هه‌رده‌یل دوجه‌یل مه‌جنوون به‌رده‌وه
سۆزیام وه‌ى شه‌وق دانه‌ى زه‌رده‌وه
دانه‌ى زه‌رد تاكه‌ى ها وه‌گه‌رده‌وه