مهردم باینه دیار، ئی بهدبهختییه
رۊن خاترجهم، لهی شاره نییه
چیم رۊن بسینم، له یاروو بهقاڵ
ئهڕای ناو ههڵوای، جومعهی ئاخرساڵ
سڵامی کردم،وهت:ئهلهیک گشتکهس
ئهو کاسه ئهڕای، چه گردیدە وهدهس؟
ماس توای؟نهیرم،روب توای؟نییه
شیر دوو جوور ههس،سفید و سیه
وهتم: ههێ مهشهی زندهی گیانت بوو
بهقاڵی بایەس گشت جنسی داشتوو
وهتم: رۊن توام،رۊن خاترجهم
ئهر دیری بیهپیم، گیان خوهد قهسهم
بهقاڵ گورجهو بی، ئهوهڵ کاری کرد
دهس چهپ هاورد دهس راسم گرد
ماشهلا وه زوور، مهشهی ئهلییهسکهر
وه ئهوهڵ تهکان، کیشادهمه دهر
وهت:خوهم عهشایر، چهکیدهی کوردم
دو مهن ڕۊن له ماڵ، خاڵووم هاوردم
دو ساعهت و نیم، له رۊن تاریف کرد
وه گیان سهرکار، مهغز له سهرم برد
نه مهزهی کردم،نه لهلی خواردم
شهش تمهن و نیم، ئهڕای شماردم
ههرچهند قهرز کردۊم، وهلی وه خوهشحاڵ
شیره و ئارد و رۊن، هاوردمه ماڵ
تا ڕۊن ڕشاندم، وه ناو تاوه
دیم بووگهن رۊن خهیلێ خراوه!
وه گیان سهرکار، شووخی دهر رهفته
من گهمان کردم، بووگهن نهفته
زهڕهی له ههڵوا، نامه بان زوان
دڵ و دهرۊنم، وهختۊ بایده بان
تاوه ههڵ گردم، وهرهو ناو هسار
گنگن لهی ههڵوا، دامه قهی دیوار
ههمسایهیل وهتن: "شامی"شیت بییه
وهتم: نه مهردم یه بهدبهختییه
پۊلم ههرامه یه بایس بڕشید
ئهر بهشی بکهم، مردییهکان کوشید
دامهی قهی دیوار، ماڵهیگ هاوردم
تاقنەمای ناوڕاس، بهنکهشی کردم
ئی قاڵه ڕهسی، وه گووش خاوەن ماڵ
هاته ناو ههسار، کردهی قرم و قاڵ
ژن خاون ماڵ، وه ماڵ هاته دهیشت
وهتو چه پنهان مردێ ئهڕام نهیشت
ئهو ههر دوشمین دا، من دهنگ نهکردم
ئاخر مهجبوور بیم، ناو باوگی بردم
تا یهی دوشمین دام، ههم پیاو و ههم ژن
چۊ سهگ ههڵامات، هاوردن پهی من
پیای هاته وهر، ژنه کهفته پشت
چنگ نانه حهڵقم، وه زیله وه مشت
ههفت ههشت دهس خواردم،دو دهس وهشانم
بیس کرانشین ڕشیانه بانم
ناو ههسار بییه، مهیدان نهبهرد
جهنگ شرووع کریا، وه ئهسڵهحهی سهرد
وه تهشت ڕهختشوور، ئهفتاوه و ئاوپاش
یهکێ ئاتهشڕیز، یهکێ وه مهقاش
تایفهی ئهوان، فامیلهیل من
ئامادهی جهنگ بین، ههم پیاو و ههم ژن
من دیم کار گهنه، ناو خودا بردم
کراواتهگهی باقرخان گردم
ههر وهک کیسهکهش له ناو حهمام
دریژی کردم مشتووماڵی دام
باقر خان له ژیر، بیس نهفهر له بان
منیش له ناوڕاس، جوور کهواو لای نان
شهمه و شهکرهلی، شهمسولا و شیرزا
مووسا و مام وهلی، مسهفا و میرزا
بچیم وه سهر وهخت، ژنهیل دهلیر
دهستهی چۊ پەڵەنگ، عدهی وینهی شیر
مهرزیه و مههوهش، مههین و مههناز
شوهره و شهراره، شههین و شههناز
ئامنه و ملووک، ئاسیه و ئهقدهس
زوڵف یهکتری، پیچانۊن وه دهس
تابان وه تاکهوش، جەیران وه جاڕوو
لهیلا وه لهقه و گوڵبانوو وه چوو
مههوهش مهدهووش بی، قهمهرتاج غهش کرد
نەسرهت خوهی ههڵاک، له بان لهش کرد
چهن شیشهی ماتیک، له وەخت جهنگ
ڕشیاو و شکیا، زهمین کرد وه رهنگ
یهی کیلوو کهنیا، زوڵف گیس جووراوجوور
ههنایی، سفید، سیاه، بازوو بوور
دو ساعهت و نیم، جهنگ ئدامه داشت
سهد لهعنهت وه رۊن، توخم نزا کاشت
بهعدهز مهرافه و دهعوا و قرم و قاڵ
سهیل جهنگ کهرهیل، یهکیهک چینه ماڵ
خوهم تهنیا مهنم، وه دڵهی پڕ دهرد
گیج و سهرگهردان، شهرمهنده و رۊزهرد
نه ڕای پهستم بی، نه ڕاگهی پیشم
نه ڕۊی ماڵ خوهم، نه قهوم و خیشم
وهتم: سوب بچم سمساری بارم
ههستیم ههڕاج کهم بچمه پهی کارم
"شامی" مهرافهی ڕۊن نهواتی
ههستید داده باد خستەدە لاتی!
دەنگ ڕووشن هۊرەیل کورد
شامی کرمانشانی