هەر كار مەكەری، هەر بەدنامەنی
من هەر دەوا كەم، تو هەر زامەنی
تو تا كەی نه فكر سەودای خامەنی؟
هەرگز خیاڵت ساتی جەم نیەن
پای خوسه و خیاڵ له لات كەم نیەن
چو دونیا دەست وه یەك دەم نیەن
سەراهیت نه سەوت زیر و بەم نیەن
هەر كار مەكەری، هەر بەدنامەنی
تو تا كەی نه فكر سەودای خامەنی؟
فەرهاد پەی شیرین، مەجنون پەری لەیل
ئی پای بیستۊن، ئەو سەهرای دوجەیل
سەنان و زاری پەی زن و ئوەیل
وەرقه پی گوڵشاه بگەردی چون سەیل
لەی ئاشقانه، تو چون كامەنی؟
تو تا كەی نه فكر سەودای خامەنی!؟
گا پەروانەی دەور شەم‌جەماڵانی
گا هەمڕاز ڕاز كەمەر لاڵانی
گاهی سكووتی، گاهی ناڵانی
گا چون ئەوداڵان وێڵ ماڵانی
نە بی‌قەراری، نە ئارامەنی
تو تا كەی نه فكر سەودای خامەنی؟
شیرین مەوینی، هەسرەت باریتەن
تەڵخی مەوینی، شین و زاریتەن
زشتی، زیبایی، بی‌قەراریتەن
پەس تو چە دەرمان دەرد كاریتەن؟
من هەر دەوا كەم، تو هەر زامەنی
تو تا كەی نه فكر سەودای خامەنی؟
ئەی دڵ پەی جیفه هەسرەت مەوازی
جیفه پەیدا كەی، پەی چیش مەبازی؟
چون هەر ساعەتی وه یەی مەجازی
دنیا پێت بیەن، نمەوی ڕازی
ئەر ڕەنج، ئەر ڕاهەت، هەر سەرسامەنی
تو تا كەی نه فكر سەودای خامەنی؟
دڵه لەت لەت بای، چون نیل سەر خەم
دەس تەمەنا كەر ویانەی مەردم
هەر چی هاواران وه لات ئاوردم
چەنی گوناهان ساڵان سەر كردم
جه ڕاسی وەهشی پەی بدرامەنی
تو تا كەی نه فكر سەودای خامەنی!؟
ئاه له خەیاڵان مەویرو نه دڵ
چو نوفڵ نووشام زەهر هەلاهڵ
چون تەی مەكەری ڕاگەی بی هاسڵ
نه خاسان شەرع، تا كەی مەكەی سڵ
هەواخای لەزەت چەن بی‌تامەنی!
تو تا كی نه فكر سەودای خامەنی!؟
دڵه كوت‌كوت بای، چەن خەیاڵ پیتەن
دیده هەی كوور بای، كول گُونای ویتەن
تووشەی بەدنامی ڕای نەهات ڕیتەن
مەر نمەزانی سان لەحەد جیتەن؟
بووم بەد ئەمەڵ تەختەی بامەنی
تو تا كەی نه فكر سەودای خامەنی!؟
ئەر تو نەكەری سەیر زڵف و خاڵ
دڵو وەسپردەی چو هەكەی خەیاڵ
ورك نەكەی پڕی لیمو چون مناڵ
ئەر ڕووژ بوو وه سی هزار بەو وه ساڵ
وینەی ئاڕفان دوور وه كامەنی
تو تا كەی نه فكر سەودای خامەنی!؟
هەی دڵ ئەر گەنج زەمانەی فانی
تەخت سلەیمان، تاج كیانی
مەهبوب چون شیرین، زوڵەیخای سانی
پەریت باوەرن پەی شادمانی
ئاخر ئاقبەت بی‌ئەنجامەنی
تو تا كەی نه فكر سەودای خامەنی!؟
گا شادمانی، گا غەمناكەنی
گا خەوفناكی، گا بی‌باكەنی
گا میر مەدهوش پڕ ئدراكەنی
گا تفڵ نادان خوەش وه خاكەنی
گا فكر ئەراق، گا له شامەنی
تو تا كەی نه فكر سەودای خامەنی!؟
ئەر فكرت ڕاهەت ماڵ و ئەیاڵەن
ڕاهەت پەی ئەولاد ئادەم مەهاڵەن
هەر كەس بواچوو ڕای دڵ بەتاڵەن
واچان «سەی یاقوو» ئەبله خەیاڵەن
هەر كام مەوینی هەر ناكامەنی
تو تا كه‌ی نه فكر سەودای خامەنی!؟
كوردزووان