ت شرین شوکەێ ، پڕ بار منی
ئاو دۊ گونوشک ، تام دار منی
ئێ خۊن شرین ، شێوە شرینم
مائگ شەو چواردەی شەوار منی
لە خورمای دەمد خورما و رۊن بکم
لە شێوەی بالاد ،چڵە و سۊن بکم
را نەقدی خالد ، چەک و چۊن بکم
تا پید برەسم ، سەد بار خۊن بکم
جۊ خنیەی رەژیاگ دەس نایدلە خۊنم
وە خال سیە ، ڕمانید سۊنم
مال و سۊن نەزر ، دەس رەژیاگد
دەمد بارە و وەر ، خالەگەد بۊنم
چۊ پید برەسم راد قرار نێرم
پاوەنم کریاس ڕێ فرار نێرم
کالام ناڕەواس خەریدار نێرم
چکم فرم دانە و یەتبار نێرم
لێوە و دەر وە دەر لە دەر کاخد
کوچوانگ دلم شەق برد له داخد
بنیشتام لە سای زلف ئێلاخد
بخواردام سێفێ تامدار لە باخد
سەر مەسی مەسان مەسی چەودە
بو گول و گول زار بو وەر قەودە
زە مین و زە مان زمگەی شە ودە
سەرتا پای عالەم یەێ سەر هەودە
هسارەی چەود ، روژناێ دنیاس
خەێبەر دلم ، وە دەسد کنیاس
رەزم رەزم گیانم ،لە عشقد ژەنیاس
هێ دوس بەو سەرم دل تەک و تەنیاس
حمیدرضاغلامی
'' دارە پیرەگە ''
داره پیرەگەی پۊتار لە جەورم
ڕەنگ پەڕی لە خەوف هزاران تەورم
واهێڵانەگەی پایز کرد خەورم
پف کردەو میلکان گەڵای چۊ بەورم
تو چۊ بەڕەزای تەرک تازە ڕەوز
کیشایدە لە سەر ئەوریشم سەوز
هەر شەو شەماڵ تێ دەی لە دەماخد
وە شەونم شوورێ پەلوەچ و شاخد
چۊ گڵا لە جەور زەلان ڕزیامە
چۊ داوڵ لە برج خوەر داڕزیامە
چۊ نان کەفتێ کوانێ سزیامە
وێنەی پەتەسوو پەت پەت سزیامە
بێگانە لە خوەم بێزار لە خێشم
کەس نیەکەی مەڵهەم دەردەیل ڕیشم
ئەگەر بزانم ڕووژێ پەل کیشم
سەد ساڵ سییە وەی دەردەو نیشم
ڕووژگار سەرد زەمانەی ناجوور
وازی چەواشەی چارەنۊس کوور
پەلوەچم شکان ، ساقم کرد کولووڕ
کردم وە ماوای مار و مەل و موور
ئەگەر چۊ وەهار بۊدە میوانم
نەسیم هەناس وەرد بەی لە گیانم
لە خەیاڵم بووەی جزر زمسانم
مەر ئەوسا سەوز بوو چەتر و سەیوانم
سەعید عبادەتیان