مه‌وله‌وى له شه‌مس، مه‌ر چووه ژنه‌فتى
له دڵ وه خه‌وه‌ر، له ديده خه‌فتى
مه‌ر چووه ژنه‌فتى هووشد چێ له سه‌ر
رووحد په‌ڕ كيشا له داوان خوه‌ر
تا جيه‌يگ چيده له ئاڵه‌م ئه‌و ده‌ر
وه‌وره نيه‌ره‌سى پاى به‌نى به‌شه‌ر
شه‌مس له ته‌بريزه‌و، شاكه له به‌ولى
هه‌ردوگ چوين مه‌جنون، هان له په‌ێ له‌يلى
له‌يل مه‌وله‌وى، شه‌مس ته‌بريزه‌ن
له‌يلى له يه‌قه‌ى مه‌جنون ئاوێزه‌ن
مه‌وله‌وى گه‌ردى دنيا له په‌ێ دووس
له به‌ڵخ تا مه‌كه تا ژێرباڵ رووس
چوارباڵ ئيران تا مڵك ئازه‌ر
گه‌ردى ماڵ وه ماڵ ته‌قان ده‌ر وه ده‌ر
خان مه‌سوير هه‌فت ساڵ چه‌وه‌رێ له ده‌ر
سوو تا ئيواره شه‌و تا ليسك خوه‌ر
كاروان و زێوار دا له بێز چه‌و
تا ئه‌زره‌تمه‌نه‌ێ ساڵان بوينێده‌و
هه‌ر وه خوداێگه هه‌ر خوه‌ى ها رێ راس
شاكه وێنه‌ی شه‌مس، خان چوى مه‌ولاناس
يه چ قاڵێگ بوى له مێژوو قوميا
نه‌ورووژ گووڵێگ بوى له زمسان خێزيا