هه‌وه‌زم نه‌یشتید جوور جارجاران
كردیده‌م وه‌خاك سمكو سواران
زانیدن نازار خوه‌شیم شیوانید
قڵاى قووڵه‌ى دڵم وه‌گه‌ن ڕمانید
ئه‌گه‌ر زانستید من خه‌تاكارم
بوه‌خشیایده‌م وه‌زام دڵ زامدارم
یه‌عشق تنه كارى كرد جه‌رگم
بمه‌ناید له لام نزیكه مه‌رگم
بیلا له مردن بووسیاید له‌بانم
تاگه‌ر ساف بویاتا ده‌رد گرانم
گه‌ردند ئازا بوو دووس شیرینم
له‌و دونیایش ئه‌راد چه‌و وه‌ئه‌سرینم
ئه‌ر هات و مردم به‌وه بان قه‌ورم
چوینكه له‌وره‌یله كه‌س نیه ده‌ورم
له‌ناو قه‌وره‌گه من خه‌وه‌ردارم
زانم هاتیده دووس نازارم
ئمجا چم ئه‌را لاى چه‌م شاعران
مه‌وله‌وى و قانع بیكه‌س و گوران
ئویشم تیمار كه‌ن زام و برینم
منیش جوور فه‌رهاد كوشته‌ى شیرینم
لاى بابا تاهیر تووزى دانیشم
ئویشم مامۆستا عاشق دڵریشم
چم وه میوانى وه‌لى دیوانه
ئویشگنه شه‌م یه له‌خوه‌مانه
چمه لاى ناڵى چه‌و وه‌ئه‌سره‌وه
ئویشن حه‌بیبه جییگ بخه‌ره‌وه
ئه‌راى بى چاره‌یگ گیروده‌ى داوه
له ئجران زانم ؛ دڵى كه‌واوه
یه هه‌م ناشاده جوور مه‌جنوونه
له عشق له‌یلى كز و و زه‌بوونه
شكات حاڵم هه‌وه ناڵى كه‌م
داخ دڵ خوه‌م له‌وره‌یله ده‌ركه‌م
سه‌ى یاقو تیه‌یگن له‌ده‌نگ هاوارم
پیره‌میرد كز بوو وه حاڵ زارم
وه‌ده‌نگ به‌رزه‌و چرم ئه‌و هه‌ژار
بڕه‌س له‌دادم هاوار هه‌ى هاوار
مامۆستا هێمن بیه نیشانم
مه‌لویل و خه‌مخوه‌ر جوور خوه‌دانم
مامۆستا ئه‌حمه‌د موختار به‌گ جاف
شه‌هاتى رام ده‌ى وه عه‌دل و ئنساف
ئویشن ناسمه‌ى ئه‌ى په‌ریشانه
یه مه‌جنونه‌گه‌ى ناو گه‌رمیانه
شاعره و دڵڕیش چه‌و وه گرینه
خه‌ڵك مه‌نده‌لى لاى خانه‌قینه
له‌بنه ماڵه‌ى كه‌ڵهور زووانه
سالم ناویه، یه سه‌ر گه‌ردانه