كویچهگان هووز راسى دوینمه‌و
ماڵه‌گان پڕ له ماسى دوینمه‌و
ماڵ من هاله نزیكاى خودا
یه‌ێ دو كویچه مه‌نیه‌سه لاى خودا
بیلنه‌م تا گه‌ر دڵم ده‌م وا بكه‌ێ
یا بتووقێ چوى كیه‌‌نى یا ها بكه‌ێ
من وه چه‌و خوه‌‌م دیمه ئاگر گردمه
من وه چه‌و خوه‌‌م دیمه گیان ده‌ر كردمه
وه‌‌و بڵوزه‌‌یل خوه‌‌مه مه‌س كردمه
روح خوه‌‌م تا ئاسمانه‌‌یل بردمه
من وه ئاگر نه‌ى ژه‌نم باوه‌ڕ بكه‌ن
گه‌رد ئاگر هه‌ى خوه‌‌نم باوه‌ڕ بكه‌ن
من تهمویرهم خوه‌‌ى ژه‌نێد و خوه‌‌ى خوه‌‌نێ
من تهمویرهم خوه‌‌ى خوه‌‌نێد و خوه‌‌ى ژه‌نێ
دون من ئى ئاگره‌یل سه‌رده‌‌سه
سوور من ئى جفت شه‌ش ناو نرده‌سه
دون من ها سویك ڕاس ئاسمان
ها جییه‌‌یل خاس خاس ئاسمان
من وه‌ل هه‌ر په‌لوه‌‌چیگا هاڵ كه‌م
من ئه‌راى هه‌ر چى هساره‌‌س ماڵ كه‌م
بیلنه‌م تا گه‌ر ده‌مم دڵ وا بكه‌ێ
یا بتووقێ جوور كیه‌‌نى یا ها بكه‌ێ
من ئه‌لان هه‌م هامه زه‌وى هه‌م ئاسمان
من ئه‌لان هه‌م هامه خوار هه‌م هامه بان
من تماشاى زه‌وى بكه‌م هه‌ڵپه‌ڕكه كه‌ى
پڕ له سازم پڕ له تارم پڕ له نه‌ى
من تماشاى چه‌م بكه‌م هه‌ڵگیژیه‌‌ى
پڕ له هایم پڕ له هوویم پڕ له هه‌ى
من تماشاى خوه‌‌ر بكه‌م هه‌ڵتویچیه‌ى
پڕ له شوورم پڕ له جامم پڕ له مه‌ى
من ته‌مام ئاسمان ها له ده‌سم
من وه یه‌ى نووڕستن كاڵیگ مه‌سم
كویچهگان هووز ڕاسى هاینه كوو
حه‌وزه‌گان پڕ له ماسى هاینه كوو
جوور گیا وه شوون عشق ساده بیم
جوور گیا كویچه وه كویچه بویده جیم