وەو زڵفە زەنجیرم بکەن
م خوەم هەیە خوازم ژەتان،
دیەر ڕاچوە دڵگیرم بکەن
ژە ئاسمان هەفتمین ،
هاتن وەرم نان ئەڵ زەمین
تا عەقڵ و عشق و کفر و دین،
دەی سۊکە گەنگیرم بکەن
بێدەنگی و داخ گوڵە ،
دەستەنگی و بار دڵە
جەم بۊنە ڵەم تا وە یەکەو،
دە بۊچگی پیرم بکەن
شینە بەش ئسپەندیار،
ئاگر خەمە گیان شەوار
ئەر پۊشێ ژەو ڕێ‌بردنە،
وە شەش پەڕ تیرم بکەن
دە خاک تو تاسوو بکەم،
خۊن دڵ و زۊخاو بخوەم
خووتر ک وە خوەشڵەخوەشێ،
دە مڵک تر میرم بکەن
هەم ڕا ت ئەر کووڵا گرن،
ژە باخ ئەنگۊرم بەرن
هەم واوەشاند ئەر کەرن،
وە وەڵنگ ئەنجیرم بکەن
هە ورسیم مەر زنج تو،
وە سێف لبنانم بووێ
هە ڕۊتیم مەر زڵف تو،
وە شاڵ کشمیرم بکەن
دونیا وە بێ ت خۊن شرین،
چۊ ئەسر باپیرم تیەڵە
بەرگ وەر فەرهای تو،
چۊ گیس داپیرم بکەن
مەردم ئڕا هەر مردگێ،
موور ئۊشن و هەیڕوو کەرن
دە بەیت سەوزەی گیانمێ،
وەختێ مرم ویرم بکەن
هەر شێعری ڕەنج بێوەرە،
خۊن دڵ و ڕۊن سەرە
ئەڵمژ قوڕێ ژەی وەڵژە یەگ،
ئاو دە چوڕ شیرم بکەن
خواسی نەخواسی م یەمە،
هامەڵ سەر هەێ قسیەمە
وەو خاڵە خۊنم بڕشنن
وەو زڵفە زەنجیرم بکەن
فەرهاد شاهمرادیان