ت مه‌حره‌م راز کام ده‌رده‌داری؟
له هجران کی وه‌ێ ته‌ور خه‌مباری؟
سینه‌د جاێ تیشه‌ێ کام دڵنه‌وازه؟
له جاێ هه‌ر تێشه‌ش یه‌ێ دنیا رازه؟
راز کام ئاشق ها سینه‌ێ پاکد؟
ئاود چوی زه‌مزه‌م کیمیاسه خاکد
وه زاهر بێ خه‌م وه دڵ ناڵانی
فه‌رسووده وه زام ئه‌قیده‌ێ ساڵانی
نیشانه‌ێ دیرین تاریخ ماد‌ی
رازدارد ئشق شیرین فهرهادی
ئه‌و‌د ناکامه له هاوشید مردن
راز ئه‌شقبازی وه ت سه‌‌پردن
شاهد ره‌نجه‌یل فه‌رهاد پاکی
وه زه‌رب تیشه سینه‌ێ سه‌د چاکی
له‌وح ئفتخار گه‌نجینه‌ێ رازی
ئستوار قامه‌ت سینه‌ێ فه‌رازی
قه‌رارگا‌ێ شیرین شه‌ودیز سوار‌‌ی
ماوا‌ێ ئاشقان دڵ بێ‌قه‌رار‌ی
جاێ سه‌ێر و شکار نوو نه‌هاڵانی
به‌هیشت به‌رین کورده‌ماڵانی
سینه خراشیا‌ێ تیشه‌ێ فهرهادی
ته‌بیعه‌ت بکر خته‌ێ ئاباد‌ی
ئه‌ێ قه‌له سه‌ربه‌رز ئه‌رام عه‌زیزی
جاێ شیرین فه‌رهاد خه‌سره‌و په‌رویزی
سه‌راود ئه‌سرین گریانه چه‌ود
وه لای گاماسیاو چوی به‌یده‌و خه‌ود
هیمان تووز خه‌م هابان شاند
هوير دڵته‌نگی وارید له باند
و‌ێ ته‌ور تا وه که‌ی خه‌مین بنیشی
په‌ێ مرگ یاران هه‌ر ئاخ به‌کیشی
سه‌ربه‌رز خه‌مین خوه‌م شیر یه‌کدم
هاو راز شه‌وه‌یل دڵ خه‌ریکدم
هه‌م ت خه‌مینی هه‌م م خه‌مبارم
ت زه‌خمی تیشه م زه‌خمی یارم