نه‌وه‌تم زویزى نه‌كه‌ف ئه‌و هه‌وه‌ز؟

هه‌وه‌زد یه‌و ڕووژ بووگه‌ ته‌و و له‌ڕز

نه‌وه‌تم یه‌و جا توو زامدار كریاید؟

یه‌و ڕووژ وه‌ تیر كوشنده‌ گیر تیاید؟

نه‌وه‌تم ڕییگ ئاسان بگره‌ وه‌ر؟

دونیا گویریاگه‌ و تو نه‌یڕى خه‌وه‌ر

یه‌ چوى دانه‌ لید خسنه‌د له‌ گڵ؟

جوور ده‌س شكیاگ كه‌فتیده‌ له‌مل؟

خاس فكره‌و بكه‌ وه‌ عه‌قڵ و ئیحساس

وه‌فا و بى وه‌فا تو له‌ یه‌ك بناس

دووسى و دڵدارى نه‌ما جوور جاران

بویه‌سه‌ وینه‌ى تیه‌وى له‌ واران

ئه‌ر ساف و كافوید زوى خه‌ڵه‌تیه‌یدن

دونیا وه‌ناشاد تو ئه‌و سه‌ر به‌یدن

كه‌س باوه‌ر نه‌یڕى وه‌ ڕى عه‌دل و ڕاس

كام یه‌ك دڵسووزه‌ وه‌لدا بى وه‌فاس

نه‌چووه‌ خه‌یاڵه‌و خوه‌د بى تاقه‌تى

خوه‌د مه‌خه‌ گیژاو وه‌هویچ په‌تى

چه‌ تواید بكه‌ید چه‌ چوو له‌وه‌رد

ئه‌وه‌ ئه‌راد نیه‌و ها له‌ نه‌زه‌رد

هه‌ بمین وه‌ داخ ڕووژ و شه‌واند

جه‌ور خوه‌د بكیش وه‌ سه‌رشاند

چه‌نى بیعارید چه‌ له‌لید ماگه‌

ئه‌و گوڵه‌ تواسید لید ئه‌ڵكه‌نیاگه‌

وه‌ شه‌و وه‌ ڕووژ سه‌رگه‌ردان بگه‌رد

وه‌ ڕه‌نج بیوه‌ر وه‌ هه‌ناس سه‌رد

كه‌س نیه‌ بپڕسى بیمار ده‌ردد چه‌س؟

وه‌فا نه‌ماگه‌ تازه‌ له‌لاى كه‌س!!