ئنسان له ناچاریی
خوه‌ی له ژێر دار پویک دڵخوه‌شیی
په‌نا ده‌ید.
به‌ڵام ئه‌هریمه‌ن...
دڵێ پڕقینه،
چه‌وێ پڕخوینه،
جوور هه‌ور سییه‌ی ترسناک
وه هه‌زار چه‌و خوفناک
ئنسانییه‌ت
خه‌یده ناو دوزه‌خ قه‌ریبانه‌ی (ئه‌ر ئه‌ر).
دویکه‌ڵ بێ‌ڕه‌همی
چووده چه‌و فریشته‌گان ئاسمان.
چراخ ئومێد، که‌م‌شه‌وقتره
له دوایین ترویسکه‌ی کوانگ
ئاخرین ماڵ ئه‌نفال کریاێ.
له‌ی شه‌و زوڵمه‌ته
خوا بێ خه‌وه‌ره،
له زنه‌‌‌وه‌چاڵ کردن
هه‌زاران کورپه‌ی نازه‌نین
هه‌زاران ئایه‌م پاک و خاکی
هه‌زاران دڵ، سه‌رچاوه‌ی دڵپاکیی
هه‌زاران..هه‌زار.. هه‌زار.. هه‌زار
دنیا کپ و کڕه، جوور کاخ سه‌رکردگان
نه‌وه‌ک ئه‌هریمه‌ن پف له چراخ ئمریان که‌ی.
به‌زه‌یی...
وه‌ر له مناڵ کورپه
له ناو چاڵ مه‌رگا خنکێ.
دوایین هه‌ناسه‌ی داڵگ و مناڵ
چووده ژێر لم بیاوان پڕ له تاوان.