و زوانم دريژ ؛ ئويشيد ئه‌را چه چم؟؟؟ مه‌گه‌ر نيه‌زانی ئيمه كه‌سوكار شه‌هيده‌يل و پێشمه‌رگه‌يل كورد فه‌يلی و گيان فدايل بارزانی ، له به‌غدا و خانه‌قين و مه‌نه‌لی و به‌دره‌و جه‌سان و زورواتيه‌و كوت و شێخ سه‌عديم !
ئويشيد ئه‌را ده‌نگ ده‌م ؟؟؟ ئه‌را ژن و مناڵه‌يل وه كيمياوی خنكياگ هه‌ڵه‌بجه له هويرد نيه؟؟؟ ئه‌را ده‌نگ ده‌م ؟ مه‌گه‌ر سه‌دان هه‌زار ژن و مناڵ ئه‌نفال كرياگ له هويرد نيه؟ ئه‌را ده‌نگ ده‌م؟ ئه‌را له هويرد نيه چوين له تيه‌ريكی شه‌و وه پۆستاڵه‌و هاتنه ناو ماڵه‌يلمان و وه ڕويت و قويت وره‌و سنووره‌يل ئيران بردنه‌مان؟ ئه‌را له هويرده‌و چويه، زياتر له ١٥ هه‌زار نه‌ونه‌مام كورد فه‌يلی بريانه موخته‌به‌ره‌يل چه‌كه‌يل كومه‌ڵكۆژو وه بێ كه‌سانه شه‌هيد كريان؟ ئويشيده پيم ئه‌را ده‌نگ ده‌م؟ چوين له هويرم چوود، هاو زووانه‌يلمان له شاره‌يل كووت و شيخ سه‌عه‌دو قه‌لعه‌ت سوكه‌رو ناوچه‌يل تر وه زوور جنگه‌يل كوردی له وه‌ريان كه‌نين و زووان و فه‌رهه‌نگ و كلتووريان ئاڵشت كردن؟ ئه‌را ده‌نگ ده‌م؟ تا دی جارێگ تر ژن و مناڵه‌يلمان نه‌خنه ناو زيله‌يل عه‌سگه‌ری و له شوون زێد و باوگ و باپيره‌يلمان ده‌رمان بكه‌ن و ئه‌را بێاوانه‌يل و بادييه‌یل باشوور بوه‌نه‌مان! له ليم پرسيد ئه‌را چه تاو ده‌م وه‌ره‌و سه‌ندوقه‌يل ده‌نگدان؟ ئاخر ئيمه كه‌س و كار شه‌هيد ليلا قاسم و مولازم جوامێر و هه‌زاران پێشمه‌رگه‌ی شه‌هيديم! به‌ڵێ ، ئه‌گه‌ر ئمڕوو نه‌چم و له ئنتخابات به‌شداری نه‌كه‌م ، سوو چه جواو تاريخ بێيه‌م؟ ئه‌گه‌ر نه‌چم و ده‌نگ نه‌يه‌مه هاوزووانه‌يلم ؛ چوين له‌ی وڵاته سه‌ر به‌رزه‌و بكه‌م و بويشم من كوردم؟ نه‌خه‌ير...! ئه‌گه‌ر گۆله جوور ڕفته واران بوارێ و ، جاده و شه‌قامه‌گان مين ڕێژ بكه‌ن، هه‌ر چم و ده‌نگ خوه‌م جوور بوركان خه‌مه ناو سه‌ندوقه‌يل ده‌نگدان و ده‌نگ خوه‌م ده‌مه ليست هاوپه‌يمانی كوردستان و قايمه‌ی ٣٧٢ تا دڵ دوشمنه‌يل و ناحه‌زه‌يل بارمه له‌رزه.
به‌س يه‌ڵا...! خاڵو ئه‌گوه‌ر و ميمگه خه‌زاڵه‌و لالو حه‌مه و خۆ‌شكه خه‌بات و كاك تێكۆشه‌ر؛ ئه‌ڵسن ..! ئه‌ڵسن و هێمه‌ت بكه‌ن و بيلا ده‌س بگريم و وه چوپی كيشان وه‌ره‌و سه‌ندوقه‌يل ده‌نگداين بچيم و، وه ده‌نگ خوه‌مان وه گێشت دونيا بفامنيمن ك كورد له به‌غدايش زينگه‌و
كه‌س نه‌ويشی كورد مردگه، كورد زينگه. زينگه‌و قه‌د نيه‌كه‌فێد ئاڵاگه‌مان.