بوڵبوڵ وه‌بى كه‌و له‌ چیمه‌ن و باخ

ئاوازى كزه‌ و پڕ له‌ ئاخ  و داخ

ئه‌ر شاقه‌ى كه‌وهات وه‌نه‌زم جوانى

بوڵبوڵ جوواوى ده‌ى زانیگ زووانى

دایم من گووش ده‌م وه‌ده‌نگ  ئاوازد

وه‌نه‌زم جواند و وه‌ قسیه‌ و ڕازد

وه‌ختى ده‌نگ  تن تیه‌یگنه‌ گووشم

چمان سه‌ر مه‌س و مات و بى هووشم

چم وه‌خه‌یاڵه‌و  وه‌ ته‌نیا نیشم

سه‌ر له‌لیم شیویه‌ى هه‌ ئاخ ئه‌ڵكیشم

سه‌داى ده‌نگ  تن و كزه‌ى شه‌وانم

وه‌لیا ئه‌ڵگریه‌ى ده‌روین و گیانم

هاوار كه‌م حه‌كیم بڕه‌سه‌ دادم

نه‌یله‌م بسوزیه‌م بیه‌ نه‌جادم

دراره‌م له‌ خه‌م و كزه‌ى شه‌وانم

هه‌زه‌ته‌مه‌ن ئه‌را تووزى ده‌رمانم

حه‌كیم هاته‌و بان جه‌سه‌ى سوزیاگم

زه‌ڕه‌بین خس له‌ناو دڵ ئه‌ڵگزیاگم

وه‌ت قه‌ڵه‌م و قاقه‌ز شیشه‌ى مه‌ره‌كه‌و

چریكه‌ى گه‌ناسر ئه‌ول مانگه‌شه‌و

چه‌میانه‌ویه‌ك  واده‌ى سێ چوارشه‌و

وه‌ل ده‌نگ  زوڵال َ قاسپه‌ قاسپ كه‌و

یانه‌ تیماركه‌ن زام ده‌شت وه‌ناو

زامد گرانه‌ بى هه‌دو  هه‌ساو

زام و ده‌رد تن هن دڵداریه‌

ده‌رد و علله‌ت تر له‌ ده‌ورد نیه‌

وه‌تم هه‌ى هاوار حه‌كیم دڵسوزم

خوه‌م خه‌وه‌ردارم بیلا بسوزم