سەرۆک هەرێم کوردستان داوای دەرکردن یاسایگ سەردەمیانە کەێد کە ژیانیگ خاستر وە کرێکارەیل و خیزانەیلیان بەێد
یەیش لە لێدوانیگ پیرووزبایی هات وا بوونەی رووژ کرێکارەیل کە کەفێدە یەکەم مانگ ئایار.
سەرۆک هەرێم کوردستان لە بەیاننامەگە وتیش: لە یەکەم مانگ ئایار رووژ جیهانی کرێکارەیل، گەرمترین پیرووزبایی خوەم لە گشت کرێکارەیل کوردستان و عراق و جیهان کەم و ئافەرین لە دەسە مێنیەیلیان کەم و ئومید دڵنیایی و ژیان ئاسوودەیی و شانازی ئەرایان خوازم”.
بارزانی وتیش: لە وەختیگ وە پیزانین و سوپاس نووڕمە رەنج و مانی کرێکارەیل و رۆڵ کارایان لە پڕۆسەی ئاوەدانکردن و بیناسازی، پشتیوانی وەردەوام خوەم ئەرا گشت ماف و داواکارییە رەوایلیان دووپات کەم، و دووپاتیش کرد لە گرنگی بویین یاسایگ پێشکەفتگ و سەردەمیانە کە ژینگە و ژیانیج گونجیاگ و خاستر ئەرا چین رەنجدەر کرێکارەیل و خیزانەیلیان گەرەنتی بکەێد”.
سەرۆک نێچیرڤان بارزانی داوا لە سەندیکایل و ریخریایەیل کرێکاری کرد، تەقەلای زیاتر بیەن ئەرا مسۆگەرکردن و مقیتیکردن ماف کرێکارەیل و دڵنیابوین لە یەکسانی لە هەل کار بایەسە لایەنە پەیوەندیدارەیل چەودیاری خیزان ئەو کرێکارەیلیش بکەن کە لە مەوقەی کارکردن گیانیان لەدەسدانە و گرنگی وە خاسترکردن رەوش ژیانیان بیەن”.
یەک ئایار رووژ جیهانی کرێکارەیل، بوونەیگ کە کرێکارەیل جیهان لەناوی ئاهەنگ سازن و داوای مافەیلیان کەن.
چیرووک رووژ جیهانی کرێکارەیل لە ئوسترالیا دەسوەپی کرد، کە کرێکارەیل لە ٢١ نیسان ١٨٥٦ دەسکردن وە دەرچگن ئەرا خوەینشاندان تا داوای رووژیگ ٨ ساعەتی ئەرا کار بکەن، ئیجا خوەینشاندان لەو رووژەو گشت ساڵیگ وەردەوام بوین وەخاتر رەسین وە خواست خوەیان.
لە 1 ئایار ساڵ 1886 زیاتر لە 340 هەزار ئەمریکی راگەیان کە کار وەجی هیلن و دەس وە مانگرتن کەن ناڕەزایەتی کرێکارەیل لە 4 ئایار لەلایەن هیزەیل پولیس لە شار هایمارکێت پەلاماری دریا، و یەیش بویە مدوو لەدەسدان گیانی فرەیگ لە کرێکارەیل.
لە ساڵ ١٨٨٩ کۆنفرانس ناودەوڵەتی کرێکارەیل ٤٠٠ نوێنەریان بەشداری لەی کۆنفرانسە کرد و بڕیاریگ دەرچگ کە رووژانە ٨ ساعەت ئەرا کارکردن دیاریکریا.
لە کۆنفرانسەگە پێشنیار نوێنەر کرێکارەیل شار بۆردۆی فەرەنسی لاڤین پەسەنکریا ئەرا دیاریکردن ١ ئایار جویر رووژ جیهانی کرێکارەیل و ئی رووژە لە ساڵ ١٨٩٠ەو تا ئیسە وەڕیەو چوود.
ئی رووزە بویە بەشیگ لە فەرهەنگ گشت وڵاتەیل جیهان.
