بەلەدرووز.. تینگی دەێدە ٣٠ ئاوای وخەڵکەگە نوقڵانەی کووچکردن دەن

شەفەق نیوز/ ٣٠ ئاوای کشتوکاڵی باشوور قەزای بەلەدرووز خوەرهەڵات دیالە، هەڕەشەی کووچکردن دان، لەوەر تینگی وهشکی و کەمەوبوین ئاژەڵ ونەمان سەرچەوەی ژیان.   

پەیامنێر ئاژانس شەفەق نيوز لە زوان خەڵک ئاوایەیل وت: ٣٠ ئاوای کشتوکاڵی لە باشوور قەزای بەلەدرووز سەرچەوەیل ژیانیان لە "کشتوکاڵی و ئیوەتکردن ئاژەڵ" لەدەسیان چگ، لەوەر نەمان ئاو و هشکەوبوین چەم وجووەیل، ودیاری کردن ک ئاو بەنادو سدوور بەش چەم وجووەیل ئاویاری نیەکەێد، چوینکە یە دوو ساڵە واران نییە.  

خەڵکەگە داوا لە حکومەت دیالە و فەرمانگەیل سامانەیل ئاوی کردن چارەیگ پەیا بکەن تا وەشیوەی زوییگ دەیان هەزار خیزان لە کارەساەتەیل سەختیگ رزگار بکەن.  

دیالە کەفتیەسە وەر سەختترین هشکەساڵی لە میژووی، لەوەر کەم وارانی و نەوین ئاو لافاوەیل لە ئیران وناوچەیل کوردستان یە دوو ساڵە.