بەغداد باس هووکارەیل کەم ئاویەگە کەێد
2021-06-30T11:31:02+00:00
شەفەق نیوز/ وەڕێۆبەر ئاو پارێزگای بەغداد، رەعەد خەیری، ئمڕوو چوارشەممە، ئاشکرای هووکارەیل کەمی ئاوەگە کرد لە بەشیگ لە ناوچەیل بەغداد و دەورگردی.
خەیری لە بەیاننامەیگ ئمڕوو وت: هووکارەیل کەمی ئاوەگە لەوەر خراوی کارەبای نیشتمانی دروس بوینە، وتیش؛ هەمیش لەوەر بڕین تەکانەیل چەمەیلە، جوور چەم ٩ نیسان، ک ئاو ئەرا کەرتەیل وەڕێۆبەرایەتی ئاو پارێزگاگە رەسنن.
وەڕێۆبەر ئاو بەغداد باس ئەوەیش کرد ک پڕۆژەیلیگ پەککەفتگ هەس، لەلیان پڕۆژەی چارەسەری یەکجاری لە قەزای نەهرەوان، و پڕۆژەی ئاو زهور، ک هیچ لەلیان ئەنجام نەیریاگە تا سوود لەلیان بگریەێد.
و دیاری کرد ک ئاوەگەی نەهرەوان هالە ژیر تاقیکردنەوە لەلایەن وەزارەت تەندروسی وژینگە.
